Агроөнеркәсіптік кешен саласындағы жобаларды кредиттеу

Жалпы ақпарат

Агроөнеркәсіптік кешен саласындағы жобаларды жеңілдетілген кредиттеу жөніндегі мемлекеттік бағдарлама азық-түлік өнімдерінің импортын қысқартуға және елдің азық-түлік қауіпсіздігін қамтамасыз етуге бағытталған.

Мемлекеттік бағдарламаның негізгі бағыттары:

Агроөнеркәсіптік кешен саласында жаңа кәсіпорындар құруға немесе қолданыстағы кәсіпорындарды кеңейтуге бағытталған жобаларды іске асыру:

• тауарлы-сүт фермалары (қуаттылығы 400 бастан бастап);
• ет бағытындағы құс фабрикалары (жылына 5 000 тонна құс еті өндірісінен бастап);
• етті мал шаруашылығы кәсіпорындары (5 000 бастан бастап);
• бордақылау алаңдары (5 000 бастан бастап);
• ет өңдеу кәсіпорындары (сағатына шартты түрде 8 бас өңдеу қуаттылығынан бастап);
• сыйымдылығы 10 000 бас ауыл шаруашылығы малына арналған мал базарлары;
• көкөніс сақтау қоймалары (1 000 тоннадан бастап);
• жеміс сақтау қоймалары (1 000 тоннадан бастап);
• өнеркәсіптік жылыжай кешендері;
• ауыл шаруашылығы өнімдерін, оның ішінде жүн мен теріні терең өңдеу, сондай-ақ құрама жем өндіру кәсіпорындары;
• өндірістік қуаты жылына 25 тоннадан бастап акваөсіру объектілерін өсіру шаруашылықтары;
• құс шаруашылығындағы асыл тұқымды репродукторлар;
• заманауи су үнемдеу технологияларын (жаңбырлатып және тамшылатып суару) қолдана отырып суармалы егіншілік (картоп, көкөніс және мал азығын өндіру);
• қой шаруашылығы фермалары (5 000 бастан бастап);
• ауыл шаруашылығы өнімдерін, оның ішінде жүн мен теріні терең өңдеу және құрама жем өндіру кәсіпорындарын іске асыруға пайдаланылған қарыздарды қайта қаржыландыру;
• жұмыртқа бағытындағы құс фабрикалары (жылына 80 миллион дана жұмыртқа өндіру қуаттылығынан бастап);
• мал шаруашылығы өнімдерін өңдейтін сою пункттері.

Қатысу шарттары

• Бір жоба бойынша кредиттің ең жоғары сомасы – 5 (бес) миллиард теңгеден аспайды.
• Кредит мерзімі – 10 жылға дейін.
• Сыйақы мөлшерлемесі – жылдық 2,5%-дан аспайды.
• Негізгі борышты өтеу бойынша жеңілдікті кезең – 24 айдан аспайды.
• Қоса қаржыландыру мөлшері – жоба құнының кемінде 10%-ы.
• Кепілдік қамтамасыз ету міндетті.

АӨК саласындағы жобаларды іріктеудің негізгі өлшемшарттары

1. Әлеуметтік маңызы бар азық-түлік тауарлары бойынша импортты алмастыруды ескере отырып, салалық орындылығы.
2. Өңір халқын сапалы әрі қолжетімді азық-түлік өнімдерімен қамтамасыз ету.
3. Уақытша және тұрақты жұмыс орындарын құру.
4. Өтініш берушінің ауыл шаруашылығы өнімдерін өндіру және (немесе) өңдеу саласында кемінде 5 жыл жұмыс тәжірибесінің болуы немесе кәсіпорын басшысының осы саладағы кемінде 5 жыл еңбек өтілінің болуы.
5. Кредиттік есеппен расталған, кредиттік және лизингтік міндеттемелер бойынша 90 күннен асатын мерзімі өткен берешектің болмауы.
6. Берік жемшөп базасын қалыптастыруға жеткілікті ауыл шаруашылығы жерлерінің және ауыл шаруашылығы техникасы паркінің материалдық-техникалық жарақтандырылуының болуы.
7. Салықтар мен бюджетке төленетін басқа да міндетті төлемдер бойынша мерзімі өткен берешектің болмауы.
8. Қазақстан Республикасының «Оңалту және банкроттық туралы» Заңына сәйкес тарату, банкроттық, оңалту рәсімдерінің немесе қызметін тоқтата тұрудың болмауы.
9. Қарыз алушының бюджет кредиттері есебінен емес, құжаттармен расталған жоба құнының кемінде 10%-ы мөлшерінде өз қаражаты есебінен қоса қаржыландыруды қамтамасыз етуі.
10. Қазақстан Республикасының заңнамасына сәйкес рәсімделген, құқығын және бағалау құнын растайтын құжаттар ұсынылған, кредит сомасының кемінде 30%-ын құрайтын өтімді кепіл мүлкімен қамтамасыз ету.
11. Қазақстан Республикасының «Қазақстан Республикасындағы сәулет, қала құрылысы және құрылыс қызметі туралы» Заңының 9-1-тарауына сәйкес жобаға оң сараптама қорытындысының болуы (сараптама талап етілетін жобалар үшін).

Құжаттар тізбесі

Агроөнеркәсіптік кешен саласындағы жобаларды кредиттеу бағдарламасы бойынша кредит рәсімдеу үшін ұсынылатын құжаттар:

1. Қаржыландыруға өтінім және сауалнама.
2. Кредиттік бюроға, мемлекеттік және мемлекеттік емес органдарға, бұқаралық ақпарат құралдарына берілген кредит туралы және шарт бойынша міндеттемелердің орындалуы немесе орындалмауы туралы ақпаратты ұсынуға және алуға келісім.
3. Кредиттік бюродан алынған кредиттік есеп (15 күнтізбелік күннен аспауы тиіс). Қолданыстағы кредиттері болған жағдайда – тиісті банктерден қарыз берешегі туралы анықтама.
4. Қарыз алушының төлем қабілеттілігін бағалауға мүмкіндік беретін бизнес-жоспар.
5. Кәсіпорынның немесе кәсіпорын басшысының ауыл шаруашылығы өнімдерін өндіру және (немесе) өңдеу саласында кемінде 5 жыл жұмыс тәжірибесін растайтын құжаттар.
6. Жемшөп базасын қалыптастыру үшін ауыл шаруашылығы жерлерінің және ауыл шаруашылығы техникасы паркінің материалдық-техникалық жарақтандырылуының бар екенін растайтын құжаттар.
7. Жоба құнының кемінде 10%-ы мөлшерінде өз қаражатының және (немесе) өз мүлкінің қатысуын растайтын құжаттар.
8. Ұсынылатын кепіл мүлкіне құқық белгілейтін және сәйкестендіру құжаттары.
9. Кепіл мүлкін тәуелсіз бағалау туралы есеп.
10. Кредиттеу нысанының құнын растайтын құжаттар.

Заңды тұлғалар үшін:

• мемлекеттік тіркеу (қайта тіркеу) туралы анықтама/куәлік, жарғының көшірмесі, құрылтай шарты (бар болса), бағалы қағаздар ұстаушылар тізілімдері жүйесінен үзінді немесе барлық акционерлерді (қатысушыларды) және оларға тиесілі акциялар (үлестер) санын көрсете отырып қатысушылар туралы мәліметтер – өтініш берушілер мен кепіл берушілер үшін;
• заңды тұлғаның қаржыландыру алуға және (немесе) мүлікті соттан тыс өткізу құқығын бере отырып кепілге беру туралы уәкілетті органының шешімі – өтініш берушілер мен кепіл берушілер үшін;
• бірінші басшының жеке куәлігі (паспорты) көшірмесі, оны тағайындау туралы уәкілетті органның шешімі және қызметіне кіріскені туралы бұйрықтың көшірмесі – өтініш берушілер мен кепіл берушілер үшін;
• соңғы екі есепті жылға арналған қаржылық есептілік және бухгалтерлік баланс баптарының ашып көрсетілуі, бар болған жағдайда аудиттен өткен қаржылық есептілік.

Жеке тұлғалар үшін:

• жеке куәліктің (паспорттың) көшірмесі және өтініш берушінің және (немесе) кепіл берушінің құқықтық мәртебесін растайтын құжаттар;
• жұбайының (зайыбының) қаржыландыру алуға және (немесе) мүлікті соттан тыс өткізу құқығын бере отырып кепілге беруге нотариат куәландырған келісімі немесе некеде тұрмайтыны туралы өтініші.

Қажет болған жағдайда қосымша құжаттар сұратылуы мүмкін.

Кеңес алу

Кеңес алу үшін мына мекенжайға хабарласуға болады:

Петропавл қаласы, Н. Назарбаев көшесі, 69
(Кредиттеу және жобаларды басқару департаменті)

Телефон: +7 (7152) 50 08 32.