«Солтүстік» ӘКК Qostanay Invest 2026 инвестициялық форумында іскерлік байланыстарын кеңейтті

«Солтүстік» ӘКК» АҚ Басқарма төрағасының инвестиция тарту жөніндегі орынбасары Қайрат Сансызбаев Солтүстік Қазақстан облысының делегациясы құрамында Qostanay Invest 2026 инвестициялық форумына қатысты.

Форумға мемлекеттік органдардың, бизнес-қоғамдастықтың, инвесторлар мен сарапшылардың өкілдері жиналды. Іс-шара барысында индустриялық даму, инвестиция тарту және жаңа жобаларды іске асыру мәселелері талқыланды.

Пленарлық сессияда Allur Group директорлар кеңесінің төрағасы Андрей Лаврентьев, Freedom Holding Corp. негізін қалаушы Тимур Турлов, кәсіпкер Қудрат Шамшиев және отандық ірі компаниялардың басқа да басшылары сөз сөйледі. Спикерлер ауқымды инвестициялық жобаларды жүзеге асыру, өнеркәсіпті және цифрлық экономиканы дамыту тәжірибелерімен бөлісті.

Солтүстік Қазақстан облысының делегациясы Kia Qazaqstan автомобиль зауытына, жоғары технологиялық шойын өнімдерін өндіруге маманданған KamLitKZ кәсіпорнына, сондай-ақ автокомпоненттер шығаратын зауытқа барды. Форум қатысушылары кәсіпорындардағы заманауи өндірістік үдерістермен, өндірісті оқшаулау деңгейімен және саланы одан әрі дамыту перспективаларымен танысты.

— Мұндай іс-шараларға қатысу еліміздің басқа өңірлеріндегі әріптестеріміздің тәжірибесін зерделеуге, іскерлік байланыстарды кеңейтуге және әлеуетті инвесторларға Солтүстік Қазақстан облысының мүмкіндіктерін таныстыруға мүмкіндік береді, — деді Қайрат Сансызбаев.